acrocircus

Acrocircus é unha comedia satírica que recrea a vida dun vello acróbata e narra a historia do teatro e o circo a través dos séculos. O protagonista é interrompido por un mozo músico e "activista" que relaciona esa historia coa inmigración, a desigualdade e as invasións violentas, insistindo co seu amor, a resiliencia, a liberdade, a dignidade e o non apoiar as guerras e impulsar a paz.
O espectáculo (teatro, acrobacia e circo) é interpretado por sete personaxes dunha cor que transitan por diferentes disciplinas como a actuación, o clown, os zancos convencionais e en patines, os malabares e a música en vivo, que fan de Acrocircus un espectáculo cheo de reflexión, sensibilidade, risa, fantasía e amor. Enerxía, colorido, zancos e zancos sobre patíns, música, coreografías... Esta obra de Tchyminigagua tráenos imaxes de festa e entroido a través dunha nena que nos fai soñar con encantamentos fantásticos de alegría, paz e vida.

el autoestopista intergaláctico

Un show de ciencia ficción, de clown e transformismo, con continuas mudanzas de vestiario e personaxes cómicos dotados de poderes propios que desafían a lei da gravidade con equilibrios imposibles, que teñen tamén un control total de obxectos malabares e que paralizan ó público con monólogos esmendrellantes. Benvidos a unha viaxe interestelar polo absurdo. Benvidos ao mundo do Autoestopista Intergaláctico!

finito infinito

A circularidade non ten fin. Non se sabe onde comeza ou onde remata. Podemos elixir saír desa circularidade? Pódese cortar coa monotonía e cambiar o rumbo das cousas? Que pasaría se, de súpeto, entrásemos nun mundo de fantasía onde deixamos de lado o cotián para volver xogar e divertirnos como cando eramos nenas e nenos?
A compañía arxentina asentada en Bilbao presenta no Festaclown o seu segundo espectáculo con acrobacias, hula hoops, manipulación de obxectos e clown para todos os públicos.

xelebreixon

Con Xelebreixon, Rojo Telón quere celebrar unha gran festa. Un encontro divertido e delirante. Unha nova proposta que nos trae a Maritxu e as súas tres primas: Maruxa, Pakita e Antonia. Catro novas e divertidas personaxes que non pasarán desapercibidas para o público que se achegue a desfrutar do espectáculo desta compañía-matriarcado procedente de Euskal Herria.
Un espectáculo con moito carácter, xenio e abraiantes números circenses que desafían a gravidade con acrobacias aéreas e de chan, fusionando circo, teatro, danza e humor absurdo.

Nós facemos circo, colgámonos, retorcémonos, rimos e coidámonos, para coidarvos a vós. Así que coidadiño con nós!

ecos do pasado

Dende o 2013, Vero Rilo leva contando contos, historias de vida, e outras lerias para todo tipo de público. Feminismo, tradición, memoria histórica, resistencia, alegrías, afectos e rebeldías aparecen consciente e inconscientemente no seu repertorio.

Desnortadas é unha nova sesión de narración oral enfocada a un público familiar que se vai estrear neste Festaclown 2025.

BREAKING BROKEN DREAMS

Non sempre é fácil encaixar. É o primeiro día na fábrica, unha vella factoría que acaba de herdar do seu avó e que xa viviu épocas mellores. Coa ilusión do primeiro comeza a súa xornada, pero pronto se dá de conta que as instalacións necesitan algo máis que uns amaños.

A maquinaria oxidada, os engrenaxes desaxustados, as estruturas inestábeis, convértense no escenario perfecta para un sinfín de torpezas e inesperadas habilidades. Nun mundo dominado polas máquinas a arte do circo emerxe como unha forma de rebelión e liberdade.

Las Cossas Nostra

Mia Mine e Mr. Vita son gánsteres, vítimas da moda italiana e nos convidan a entrar no seu mundo absurdo e extravagante... Danvos a benvida a ‘la familia’!!

Cun mundo cheo de laca para o pelo, ouro falso e pel de serpe, este espectáculo chega ao público de todas as idades. E a pregunta é: como superará esta parella os desastres, converténdoos en triunfos e proezas, para que todos desfruten do momento?

Unha mestura de comedia física, teatro, clown e circo, cun dúo dinámico de gánsters procedentes de Catalunya cun alto nivel técnico e un espectáculo onde todo é posible.

Fins al cel

Esta historia non se camiña: sáltase, vóase e confíase.

Fins al Cel é unha viaxe entre a fantasía e a realidade, un xogo de equilibrios onde todo parece posible e os encontros poden espertar a coraxe durmida. Un espectáculo de circo contemporáneo con barra rusa, acrobacias e emoción que nos invita a mirar cara dentro... e tamén cara ao máis alto.

Esta é unha historia de soños e transformacións, de medos que se volven impulso. Porque hai veces que só fai falta atopar a outras persoas para descubrir de que somos capaces. Fins al Cel é un salto compartido. Lixeiro e profundo. Humano e máxico. Unha invitación a superar os límites da man da compañía valenciana Spinish Circo.

marítimas

Unha sesión de narración oral para público familiar con Vero Rilo.

Din que todo o que o mar quita, dalgún xeito, o mar todo o devolve… Desta volta a marea trouxo un lote de historias de sereas que aturuxan, de raíñas co cú morado, atadoras rebeldes e mariscadoras que non calan.

Todas elas son marítimas.

Vinde aos contos coa subida, marchade coa baixada!

flash

Dani García, ilusionista galego recoñecido pola súa traxectoria, da vida a este personaxe nun encontro sen palabras, cheo de xestos, sorpresas e ilusións que mesturan o pasado cos pequenos milagres do presente.

Flash está protagonizado por un fotógrafo cun equipo doutro tempo que parece capturar non só imaxes… senón momentos máxicos.

check out

A vida de Ernesto transcorre no vestíbulo dun hotel, e entre maletas soña con deixarlle aos seus fillos un futuro mellor. Un mozo de hotel diferente entre equívocos, xogos de clown e moita diversión, que descubre ao longo dunha xornada imprevista de traballo que non hai mellor futuro que vivir desfrutando o presente.

Adrián Conde métese na pel deste personaxe que aspira a mellorar a súa vida e a da súa familia á forza de traballar de maneira obsesiva nun hotel vido a menos.

costureiriña bonita

Costureiriña Bonita é un espectáculo de Cristina Collazo que combina a maxia do xogo coa saudade dos tempos idos, un canto á muller galega modista emigrada que procurou nas feituras un xeito de facer a vida.

Costureiriña Bonita é unha peza interxeracional, onde grandes e pequenas desfrutan da música, títeres e lendas, a través dunha participación activa. Ao ritmo frenético da máquina de coser prepáranse os traxes que serven de inspiración para deixar voar a imaxinación.

intringulis

Chega ao Festaclown o encantador universo do inconfundible mago Braulio! Este entrañable personaxe intentará facer as cousas ben, pero sempre pasa algo para que a súa vida se complique e, mentres, alegre a nosa. A súa capacidade para enfrontarse a desafíos inesperados e transformalos en risas contaxiosas conquistará os corazóns de todos os presentes.

Malabares, improvisación co público, maxia e clown fusiónanse, creando así unha experiencia única para desfrutar en familia.

miss elastic

Un show de circo musical para toda a familia, que inclúe malabares combinados, humor, maxia, contorsionismo, aros hula hoops, tiro con arco e frecha cos pés, participación do público, lume, luminotecnia e burbullas.

A contorsionista arxentina é a raíña dos platós de televisión e non deixa a ninguén indiferente co seu espectáculo no que o número estrella, o nunca visto antes en Vilagarcía, é a arquería cos pés.