Os protagonistas chegan tarde ao recital. Coa orquestra a piques de comezar vense na obriga de improvisar para saír da situación. Desconcerto é un espectáculo cómico sobre a música culta posto en escena por Félix Rodríguez e Fran Rei e dirixido por Marcos Orsi. Nesta ocasión os actores estarán acompañados da Banda de Música de Vilagarcía de Arousa, coa que interpretarán grandes temas da música clásica.

Bolas, mazas, rulos… Ningunha técnica se lle resiste a este portento do circo clásico e os malabares. Fran Boza presenta Malabarabilidades, un espectáculo dunha alta esixencia técnica no que deixará máis dunha boca aberta e demostrará que é o auténtico rei dos malabares!

Raquel Veganzones e Girisho Gordon aterran no FESTACLOWN co seu novo espectáculo: Somos Circo. Un show de espectaculares acrobacias mesturadas co humor que caracteriza á compañía formada en Londres. O público gozará dun espectáculo alto en acción e baixo e conversación, alto en satisfacción e baixo en decepción!

Nun espazo ao descuberto, tres mastros, algunhas cadeiras desordenadas, uns instrumentos e unha música de fondo que convida ao encontro. Cinco persoas van chegando e as súas personalidades invaden o lugar, interactúan co público, falan, rin, contan historias e cantan algunha canción. Entre Nous chega a Vilagarcía cun espectáculo acrobático no que o vertical e o horizontal se confunden sen remedio.

Jara Ortiz presenta un contacontos cheo de humor, muiñeira e perspectiva de xénero baseado no libro Marta e a píntega, de Eli Ríos. Nesta historia, Marta coñece á píntega Oli e xuntas viaxan ao Mundo dos Contos, onde vivirán aventuras e transformarán o mundo nun lugar mellor, cheo de diversidade e máis xusto, onde sexamos iguais e as princesas dos contos poidan ser felices.

Nikita Nimoni é unha exploradora moi despistada e insegura, que percorre o mundo en busca de aventuras. Así emprende unha viaxe inesquecible, que lle servirá para superar os seus medos, e na que descubrirá que viaxar non é só cambiar de lugar, tamén é cambiar a maneira de verse a unha mesma. Monikiña chega a Vilagarcía cun espectáculo que é un canto á curiosidade e que inclúe clown, números de lume, malabares, percusión e danza.

Volverán tomar os ceos para desatar os nós que as oprimen. E deleitaranse nunha eterna bacanal para entrar nun estado de letargo e así transcender para volver ser elas. E quen son elas? Tres mulleres da compañía Rojo Telón que a través do humor, a interpretación e técnicas circenses farán que o público do FESTACLOWN se desmelene e viva unha experiencia ‘celestial’.

Kanbahiota trae a Vilagarcía un espectáculo ambicioso e arriscado con catro trapecistas, unha barra e unha estrutura de trapecio volante. Só hai que conseguir axustalo para poder conquistar o aire coas súas acrobacias, non sen algunha caída inesperada.

Con Eles e Clámide Teatro volven aliarse para presentar no FESTACLOWN a súa nova creación. Sen Guerras é o exercicio final do obradoiro de teatro dinamizado por Fran Rei coas persoas usuarias da asociación Con Eles. Acompañadas do grupo Clámide Teatro interpretarán diferentes escenas que tratan sobre a guerra en clave de humor.

Unha actriz, unha viaxe e un campamento… de persoas refuxiadas. Ela ten que actuar para as crianzas que viven alí pero parece que todo está na súa contra. Será quen de conseguilo? En principio parece que non, pero de noite unha boneca pallasa daralle o poder para transformarse e saír a buscar sorrisos. Con Smile, a asturiana De Carmela promete facer sorrir e reflexionar ao público do FESTACLOWN.