Este ano os cómicos Pedro Brandariz e Fran Rei cumpren dúas décadas de traxectoria profesional xuntos e, para celebralo, presentan o espectáculo O Gordo e o Calvo 20 Anos Despois, unha escolma dos seus mellores sketches e algunha que outra sorpresa.

Esta batucada feminista chega para animar os días previos ao Festaclown cos seus ritmos galegos inspirados no carnaval de Salvador de Bahía. Os potentes graves dos surdos combínanse coas frases vertixinosas dos repiques e as coreografías das percusionistas. Imposible non bailar!

Se hai unha compañía que sabe como animar as rúas das vilas, esa é Troula. Nacida hai case 20 anos hoxe é un dos referentes galegos de espectáculos itinerantes, con funcións para crianzas e público adulto, con escenario ou sen el.

A colombiana Fundación Tchyminigagua, logo do seu éxito en Vilagarcía fai tres anos, volve ao festival co seu novo espectáculo dirixido por Iván Prado. Unha proposta chea de música acrobacias e clown.

En Somos Olímpic@s reivindican con humor os grandes valores do deporte, que non sempre están presentes no momento da competición. Unha serie de divertidas e aloucadas escenas sobre o universo olímpico protagonizadas por usuarios/as da Asociación Con Eles e o grupo de teatro Clámide. Humor e teatro para a plena inclusión.

O mago Dani García sorprenderá ao público do Festaclown dende unha incrible cabina como as dos videntes e autómatas das feiras. Un novo concepto de espectáculo de rúa onde a audiencia gozará da maxia e o misterio da man deste fascinante personaxe.

Compañía italiana residente en Cataluña e que conta cunha recoñecida traxectoria: gañou o premio de votación popular dos XI Premios Zirkòlika de Circo de Cataluña 2020 e o Premio do público no XIII Encontro Entrepayasos de Zaragoza. Agora chega ao Festaclown cun tenro espectáculo de clown xestual no que afonda na relación humana e nas nosas emocións primarias.

Un espectáculo circense aderezado con punteos de guitarra eléctrica, redobres de batería estrambóticos, equilibrios esperpénticos e melenas ao aire que se desenvolve nunha peculiar estrutura aérea autónoma. Rolabola ofrece unha mestura entre as técnicas de circo e o Rock máis puro que non deixará a ninguén indiferente.

Neste espectáculo de narración oral Larraitz Urruzola recolle historias de mulleres que loitan por perseguir os seus soños e desexos. Historias de mulleres diversas cheas de agarimo, de ollos que miran a outros ollos.

Como unha cometa sen fío, dende o humor e o circo, esta pallasa fala soa, vai e vén porque non atopa o seu lugar. A protagonista de A Corda vai acompañada só pola súa fiel bañeira, que a fai soñar e reafirmar que os tolos, non son tan tolos.