MINOTAURO

Minotauro garda un equilibrio móbil con inspiración de Alexander Calder, dándolle forma a un minotauro. Esta proposta de circo contemporáneo de rúa é unha peza poética e visual que contrapón a dominación á colaboración.

Con música en vivo e inspirada nun imaxinario mitolóxico, asistimos á viaxe de transformación do seu protagonista que, coa colaboración do público, cabalga facendo equilibrios entre minotauros e cabalos de Troia, dente a quimera ata a liberdade máis delirante.

CHARLATÁN RODRÍGUEZ

Un charlatán chega á vila coa súa lingua afiada, os seus instrumentos afinados e seu posto de venda ateigado de remedios para todos os males. Armado de retranca e coa sabedoría que dá percorrer todos os camiños, será quen de vender ao público menciñas que non necesitan a prezos que non poden pagar, cun catálogo infinito de solucións inútiles para problemas inexistentes, laretadas baleiras, melodías inventadas, pequenas grandes ilusións e contos de impostor. Porque o noso protagonista sabe sempre o que a xente quere escoitar.

Dirixido por Fran Rei, Félix Rodríguez mestura nesta súa primeira montaxe música, comedia, maxia e moita participación, nun espectáculo para todos os públicos.

Non se deixen confundir: moinantes hai a moreas, pero ninguén engana co humor, o ritmo, a empatía e a arte de Charlatán Rodríguez.

CIRCO CAMBUCHE

Este espectáculo conta, en clave de traxicomedia, a historia dun antigo circo do século pasado, o Circo Cambuche. Kike Castro, o último sobrevivente deste circo, lembra a historia da súa familia de funambulistas e o seu amargo final. Cada domingo pola tarde, visita a vella carpa da familia e fantasea co recordo do circo, tenta subirse ao arame, como cando era neno, pero agora non se atreve.

Ante un público que só existe na súa imaxinación, un día atopa a unha muller que se parece á súa avoa, a matriarca da familia do circo. Ela dálle o valor para escalar o arame e percorrelo no seu monociclo e nel, o funambulista e o público viaxan nunha fantasía compartida. O arame convértese no fío condutor que une presente e pasado, madurez e infancia.

DANCE JOIN

Un espectáculo interactivo que combina danza e clown. A obra mestura danza, humor e música, propoñendo unha visión lúdica e autocrítica do mundo escénico, mentres convida ao público a participar no caos controlado que presenta. Esta proposta dinámica borra os límites entre artistas e espectadores.

DESNORTADAS

Dende o 2013, Vero Rilo leva contando contos, historias de vida, e outras lerias para todo tipo de público. Feminismo, tradición, memoria histórica, resistencia, alegrías, afectos e rebeldías aparecen consciente e inconscientemente no seu repertorio.

Desnortadas é unha nova sesión de narración oral enfocada a un público familiar que se vai estrear neste Festaclown 2025.

ENREDOS

Non sempre é fácil encaixar. É o primeiro día na fábrica, unha vella factoría que acaba de herdar do seu avó e que xa viviu épocas mellores. Coa ilusión do primeiro comeza a súa xornada, pero pronto se dá de conta que as instalacións necesitan algo máis que uns amaños.

A maquinaria oxidada, os engrenaxes desaxustados, as estruturas inestábeis, convértense no escenario perfecta para un sinfín de torpezas e inesperadas habilidades. Nun mundo dominado polas máquinas a arte do circo emerxe como unha forma de rebelión e liberdade.

EL ROMPE RÉCORDS

O Rompe récords soña con ser famoso e ter unha chea de fans, e fará todo o posible por cumprir o seu soño... Non é guapo, non é nada listo e non é moi forte pero ten algo que o fai diferente: conta cunha autoestima a proba de todo...

50 minutos de alta enerxía e comedia orixinal caracterizan esta posta en escena... "Saltos mortais", "habilidades paranormais", "proezas incribles", son algunhas das cousas que se poderán ver neste espectáculo, pero o máis importante é que o público non parará de rir nin un só segundo.

RIDI PAGLIACCIO

Este clásico dúo de pallasos inspírase na aria Vesti la giubba, de Pagliacci. Dous irmáns, Carabranca e Augusto, que no seu intento de facer ópera, descobren o destino tráxico do clown: facer rir, aínda tendo o corazón roto. Risas, bágoas, música, amor, canto e moitas pallasadas para toda a familia.

ROSA E AZUL

Rosa e Azul é un espectáculo de narración oral para gozar das novas narrativas da literatura infantil. Unha sesión de contos teatralizados que celebra a diversidade e que racha cos estereotipos de xénero e o binarismo imposto dende que nacemos.

A través da manipulación de xoguetes e monicreques artesáns, mestúranse historias reais con contos de ficción arredor do amor, a tolerancia, o respecto e a diversidade.

HISTORIAS PARA ESCAGHARINANSE

Unha das compañías galegas de referencia para público familiar. Ghazafelhos compóñena Montse Piñón, Pepablo Patinho e Jorge Casas. Unha compañía consolidada que nos sorprende con cada nova das súas producións, mesturando xéneros, falándonos de temas variados e levándonos a mundos cheos de maxia.

TRANVÍA Nº 12

Cinco diferentes personaxes reúnense nunha peculiar parada dun antigo tranvía, están nerviosos, desubicados, só teñen unha cousa en común… esperan. Están listos para irse, viaxar, descubrir o que lles depara o seu destino… o tranvía está alí esperándoos, pero sempre hai un motivo polo que nunca sae.

Esta emoción colectiva provocará neles unha forma inesperada de relacionarse, de coñecerse, descubrindo que teñen máis en común do que crían:  moito talento, a creatividade, o circo, o sentido do humor ante a vida e a súa peculiar resiliencia.

CONTOS ARREDOR DA TERRA

Un espectáculo unipersoal de narración oral e xograría no que a actriz, titiriteira e narradora Alba de Vales reinterpreta a tradición e pon de manifesto a súa chave; a lingua galega.

Acompañada de obxectos e algún instrumento tradicional contaranos historias e romances cantados que buscan e xogan coa propia raíz.

ROGELIO III (LA FETE)

Rogelio é un entrañable personaxe de ficción e esta é a última entrega dunha triloxía. Que pasaría se ninguén viñera ao teu aniversario? Se ninguén cantara os parabéns para ti? Rogelio volve estar só e desta vez no seu día máis especial. Queres acompañalo?

Un espectáculo de risas para toda a familia no que o actor Dani Blanco dá continuidade á saga do pallaso Rogelio. Circo, clown, corda frouxa, malabares e música e, sobre todo, moito humor.